På litterær kafé vil sonen, Olav Vesaas, fortelje om foreldra sine, om diktinga og livet på Midtbø.

Det nygifte diktarparet, Halldis Moren og Tarjei Vesaas, flytte våren 1934 inn på garden Midtbø i Vinje i Telemark og byrja straks å modernisere hovudbygningen for det komande samlivet. Tarjei Vesaas hadde då skrive fleire romanar, ei novellesamling og eit par skodespel. Halldis Moren hadde gjeve ut tre diktsamlingar. Denne innflyttingstida – midt på 30-talet – var også ei åndeleg grotid for dei begge to; Tarjei Vesaas gjorde ferdig den romanen som skulle bli gjennombrotsboka hans, Det store spelet, i 1934, og Halldis Moren (som ho enno kalla seg) gav i 1936 ut diktsamlinga Lykkelege hender, der ho uttrykkjer gleda over å skape sin eigen heim og bli mor.

Midtbø skulle bli ramma for livet og diktinga deira like til Tarjei Vesaas døydde i 1970. Der skreiv han dei viktigaste romanane sine, slike som Huset i mørkret, Fuglane og Is-slottet. Han sa sjølv at i dei siste 10-15 åra av livet sitt kunne han ikkje skrive andre stader enn på Midtbø. Halldis Moren Vesaas engasjerte seg etter krigen sterkt i det lokale kulturlivet – seinare også i mangt slags kulturarbeid på riksplan, men ho gav likevel ut nye diktsamlingar, som Tung tids tale og I ein annan skog. Etter kvart kom ho til å nytte mykje av sine skapande evner til å gjendikte klassiske skodespel frå fransk og engelsk.

Sjølv om dei reiste mykje – helst kvar for seg – og hadde langvarige utanlandsopphald, kom dei alltid heim til basen for samlivet; Midtbø.

Olav Vesaas (f. 1935) har filologisk embetseksamen frå Universitetet i Oslo og har arbeidd som kulturmedarbeidar i NRK i nesten 30 år. Han har redigert fleire diktantologiar og skrive biografiar om både Aasmund Vinje og begge foreldra sine. Den siste, Å vera å livet, kom ut hausten 2007 i samband med 100-årsjubileet for Halldis Moren Vesaas’ fødsel.

Stad: Rica Hotel Grimstad, Kirkegaten 3, Grimstad
Tidspunkt: Laurdag 21. februar kl 13.00
Inngang: Kr 50, enkel servering